“ကိုယ်ကြိုက်တာ လုပ်၊ မကြိုက်တာ မလုပ်နဲ့”
**************************************
"မိန်းမ"တွေကိုဘာသာ၊ သာသနာသုံးအားဖြင့့် "မာတု ဂါမ"လို့ခေါ်ပါတယ်။ "မာတု=မိခင်၊ ဂါမ=လမ်း"ဖြစ်လို့ "မိခင်လမ်းသွားနေသူ" လို့နားလည်ရပါတယ်။ "မိန်းမ" ဟူက (အပျိုကြီးတွေ သော်မှ) မိခင်စိတ် ပါလာတာ ချည်း။ "မိခင်စိတ်"ဆိုတာမေတ္တာဖြင့် ပြုပြင်ပေးခြင်း ပဲဖြစ်ပါတယ်။"ကာလ သမီးအပျိုလေး"ပဲကြည့်ပါလေ။ သူတို့ရဲ့ချစ်သူကို"အရက်မသောက်ရ၊ဆေးလိပ် မ သောက်ရ" စသည် စည်းကမ်းထုတ်ပြန်ပြုပြင် ပေးလေ့ ရှိတာ မညားမီကတည်းက မဟုတ်လား။ အဲဒါဟာ "မိခင် စိတ်"နဲ့ပြုပြင် ပေးနေတာလို့ မှတ်သားခဲ့ရဖူးပါတယ်။
မိန်းမတွေရဲ့အရည်အချင်းကောင်းတွေထဲမှာ"ပြုပြင်နိုင်စွမ်းရည်"ဟာလည်း ထူးခြားတဲ့ ဂုဏ်တစ်ခု အဖြစ်ပါဝင် နေပါတယ်။ ဒီသဘောကို"ကျေးဇူးရှင် မဟာဗောဓိမြိုင် ဆရာတော်ဘုရားကြီး"ရဲ့ တရား တော် တစ်ပုဒ်ထဲက ကောက်နှုတ်ပြချင်ပါတယ်။ ဒီတရားကို" ၁၉၉၆၊ မတ်လ (တပေါင်းလ) (လားဟူ၊ လီရှော တိုင်းရင်းသားများရဲ့ ဗုဒ္ဓဘာသာခံယူပွဲကြီး)"မှာ ဟောခဲ့ပါတယ်။ တရားဇာတ်ကြောင်းပါ ဇာတ်ဆောင်များကတော့ "လင်မုဆိုးနဲ့ မယားသောတာပန်"တဲ့။ လင်နဲ့မယားတို့ရဲ့ ဂုဏ်ရည်က အဲသလောက်ကွာဝေးပါတယ်။
"မုဆိုး"ဆိုတာက သားကောင်တွေကို သတ်ဖြတ်ရောင်း စားလို့ "အပါယ်လေးဘုံ"ကို သွားဖို့ သေချာ နေသူ၊ "သောတာပန်"ဆိုတာကတော့"အပါယ်တံခါးပိတ်လို့ ငါစွဲ ဒိဋ္ဌိမရှိတော့ဘဲ ရတနာသုံးပါး၌ ယုံမှားသံသယ လုံးဝမရှိ တော့တဲ့သူ"။သို့သော်"သောတာပန်အဆင့်မှာကိလေသာ မကုန်သေးတဲ့ အတွက်လင်ယူ၊ သားမွေးပြုကြသေး တယ်။ အဲဒီတော့ မယားသောတာပန်ခမျာ လင်မုဆိုးကြီး နဲ့မှ ကြံကြံဖန်ဖန် ပေါင်းဖက်တွေ့ရတဲ့ အကြောင်းက တော့ "ရှေးရေစက်"လို့ပဲ အလိမ္မာစကား ဆိုရလိမ့်မယ်။ တည့်တည့်ပြောရရင်တော့ "ကာမပြစ် ကာမ၀ဋ်"ပေါ့။ တနည်းအားဖြင့်တော့ သံသရာက ပါလာတဲ့ "အစွဲ တဏှာ"ကြောင့်ပေပေါ့။
ကြည့်ပါလေ။ ဟိုရှေးအတီတေ"ကဿပဘုရားရှင်" ရွှေလက်ထက်တော်က "လင်မယားတစ်ဘ၀" တော်ဖူး ရုံမျှဖြင့်၊ဒီဘ၀မှာ "မုဆိုးကြီးလင်တော်ချင်စိတ်" ဖြစ်ပေါ် လာလေခြင်း။ နှစ်ပေါင်း အသင်္ချေ ကာလမှာ ငုပ်နေတဲ့ အစွဲတဏှာက အဲဒီလိုပြန်ပေါ်လာတာနော်။ (ဘ၀ဆက်တိုင်း ညားခဲ့ဖူးသူတွေ ဘယ်လိုနေမယ်မသိ။) သွေးသံနဲ့ရဲရဲ သားကောင်လေးတွေကို ထမ်းပိုးပြီး တောထဲက ပြန်လာတဲ့ မသတီစရာ ဒီ"မုဆိုးကြီး"ကိုမှ ချစ်မိလေတဲ့ "သောတာပန် မယားအလိမ္မာခမျာ တစ်နေ့ တစ်နေ့ဒီမုဆိုးကြီး "သူတော်ကောင်း "ဖြစ်လာအောင် ပြုပြင်ပေးဖို့သာ ကြံစည်နေတာပါ။
"မုဆိုးကြီး"မှာတော့ "ဘုရား"ပွင့်နေတယ်ဆိုတာတောင် မသိပါဘူး။ သတ်ရ၊ ဖြတ်ရ ၊ရောင်းရ၊ ၀ယ်ရရင် ပျော်နေတာပါပဲ။ သူက "အန္ဓပုထုဇဉ်"ပဲ။ "အန္ဓပုထုဇဉ်နဲ့ သောတာပန်" လင်မယားသာဆိုရ လောကအမြင်ချင်းက နေထွက်ရာအရပ်နဲ့ နေ၀င်ရာအရပ်လောက် ကွာဝေးပါ တယ်။ မုဆိုးကြီးက"အပြစ်ရှိ အပြစ်မဲ့"၊ "အကျိုးရှိ၊အကျိုးမဲ့" ဘာမှခွဲခြားမသိ။ "သောတာပန်"ကတော့ "နိဗ္ဗာန်"ရောက်ကြောင်းအထိ သိနေပြီ။ လင်မယားချင်း အဲဒီလောက်ထိ ခြားနား ဝေးကွာ လွန်းလှလေရဲ့။
ဒါပေမဲ့ သောတာပန် မယားအလှ စိတ်မပျက်ဘူး။ ချစ်သူ ကိုကယ်တင်ရမယ်။ မုဆိုးကြီး စိတ်အေးကြည် သာတဲ့ အချိန်ကောင်း စောင့်ပြီး ဒီလို တောင်းပန်ရှာသ တဲ့။
"ဘုရားထံတော်သွားလို့ ကျွန်မအတွက် တရားတစ်ပုဒ် လောက် နာပေးပါနော်"
"ဟာ….ငါနဲ့မဖြစ်လောက်ဘူးထင်ပါရဲ့ကွာ"
အဲဒီလောက်တော့ မုဆိုးကြီး သိသေးတယ်။ ဒါကြောင့် ငြင်းတယ်။ ဒါပေမဲ့ တစ်ခါကနှစ်ခါ မငြင်းသာတော့ဘဲ မယားအလိုကျ ဘုရားထံသွားတယ်။ မုဆိုးကြီး ကျွတ် မှာ ကိုမြင်တော်မူတဲ့ "ဘုရားရှင်"က စင်္ကြန်လျှောက်ရင်း အသင့်စောင့်လင့်တော်မူတယ်။ မုဆိုးကြီးရဲ့စရိုက်ကို မုဆိုးကြီး လျှောက်ထားပုံ စကားအားဖြင့် "ဆရာတော် ဘုရားကြီး" သရုပ်ဖော်လိုက်ပုံဟာ အင်မတန်ပီပြင်လွန်း လှပါတယ်။
"တပည့်တော် မအားဘူး၊ အလုပ်တစ်ဖက်ကြားက အရှင်ဘုရားဆီလာရတာ။ တရားတိုတိုပဲဟောပါ ဘုရာ့"
"ဒါယကာ…..သင်ကြိုက်တာ သင်လုပ်၊ သင် မကြိုက်တာ သင် မလုပ်နဲ့"ဘုရားကအဲသလို မိန့်ကြားလိုက်ပါတယ်။
"တပည့်တော် တရားနာချင်တယ် ဘုရာ့"
"ငါ ဟောပြီးပြီ"
ဟယ်….။ မုဆိုးကြီး အလွန်ဝမ်းသာသွားတော့တယ်။ သူထင်တာ သူ့ကိုကြိမ်းမောင်းမယ်။ အပြစ် တင်မယ် ထင်နေတာ၊ အခုတော့ အပြစ်မတင်၊ မကြိမ်းမောင်း တဲ့အပြင်" ကိုယ်ကြိုက်တာ ကိုယ်လုပ်"ဆိုတော့ ၀မ်း မသာဘဲ ရှိပါ့မလား။
တစ်ခါ သူထင်ထားတာက "အကုသလော ဓမ္မော" အစရှိတဲ့ အသိုင်းကြီး အ၀ိုင်းကြီးတွေနဲ့ ဟောမယ်ထင် ခဲ့တာ။ ခုတော့ ကြည့်စမ်း၊"စကားလုံးလေး နှစ်လုံး။ ငါ ဦးကုန်းချတာလောက်တောင်မှ မကြာပါလား" တဲ့။ မယား ဆီ အားရ ၀မ်းသာပြေးလွှားရင်း-
"နင်တို့ ဘုရားက"သင်ကြိုက်တာ သင်လုပ်၊ သင်မကြိုက် တာ သင် မလုပ်နဲ့" လို့ပဲ ပြောလိုက်တယ်။ ငါ့ကို မဆူ ဘူး၊ မကြိမ်းဘူး" ..လို့ ခြံဝက အော်ဟစ် ပြောဆိုတယ်။
မယားအလိမ္မာက"သောတာပန်"ပီပီသိလိုက်ရပြီ၊ သူသိ လိုက်ရတဲ့ "တရားအဓိပ္ပါယ်"ကို အကောင် အထည်ဖော် ဖို့ မယားအလိမ္မာလေး ပြုလိုက်ပုံက မုဆိုးကြီးကို အံ့သြ တုန်လှုပ်သွားစေခဲ့တယ်။သူ့မယားက သူ့ရဲ့လေးနဲ့ မြားကို အသင့်ကောက်တင်ပြီး သူ့ကိုပစ်ခတ်မယ်လို့ ရင်ဝဆီ ချိန်ရွယ်ထားပါရောလား။
"ဧကန္တ နောက်တစ်ယောက်နဲ့များ…."သူ့မယား လင်ငယ် တွေ့လေသလား ထင်မှားက ဇဝေဇ၀ါကြီးနဲ့ ရှေ့တိုး အလာ-
"ရှေ့မတိုးခဲ့နဲ့၊ အရှင့်ကို သတ်ရလိမ့်မယ်" မယားရဲ့ မာကြောလှတဲ့အသံ။
"ရှင်မ ၊ နောက်တစ်ယောက်တွေ့လို့များ ဒီလို "
"မဟုတ်လိုက်လေ"
"ရော် ရှင်မပဲ ဘုရားဆီသွား တရားနာ ဆို…"
"ဟုတ်ပြီ ၊ ဒီ လေးနဲ့မြားအကြောင်း ရှင် ဘယ်လောက် ထိ သိသလဲ"
"ငါ့ လက်နက်အကြောင်း ငါ ကောင်းကောင်း သိတာပေါ့ ဒီ အဆိပ်လူးမြားက သားကောင်တောင် ထွင်းဖောက် သွားစရာမလိုဘဲ ထိရုံနဲ့အဆိပ်သင့်ပြီး သေစေနိုင်တယ်"
"ဒါဖြင့် အဆိပ်လူးမြားနဲ့ အရှင့်ကို ပစ်ခတ် သတ်ဖြတ် မယ်ဆို အရှင် ကြိုက်သလား၊မကြိုက်ဘူးလား"
"ကိုယ်ချင်းမစာ ပြောရက်လေခြင်းကွာ၊ ငါ သေရမှာ ငါ ဘယ်ကြိုက်ပါ့မလဲ"
“အဲဒါ ဘုရားပြောတဲ့ (သင်ကြိုက်တာ သင်လုပ်၊ သင်မကြိုက်တာ သင် မလုပ်နဲ့) ဆိုတဲ့ စကားပဲ”
“ဟေ…ဟင်…..ဟုတ်ပေသားပဲ”
မယားစကားအဆုံးမှာပဲ မုဆိုးကြီး “သောတာပန်” တည် သွားလေရဲ့တဲ့။“စကားနောက် တရားပါတယ်” ဆိုတာ အဲဒါပါပဲ။ “အနာထပိဏ်”စတဲ့ ဗုဒ္ဓ၀င်မှာ အထင် ကရ ပုဂ္ဂိုလ် ကျော်များဟာ ဘုရားနဲ့တွေ့ပြီး ဘုရားရှင်ရဲ့ တရားတော် နာကြားပြီး “သောတာပန် ”တည်ကြပါ တယ်။
ဒီ“မုဆိုးကြီး”ကတော့ “မယား”စကားနာကြားပြီး “သောတာပန်” တည်သွားတဲ့ ထူးခြားတဲ့ ဇာတ်ဆောင် ကြီးပါ။ မိန်းမတို့ရဲ့ ပြုပြင်နိုင်စွမ်းရည်ကလည်း အံ့ ဖွယ်ပါပေ။ "ဆရာတော် ဘုရားကြီး" ဟာ တရားနာ ပရိတ်သတ်ထဲက မုဆိုးအလုပ်နဲ့အသက်မွေးနေတဲ့ အချို့သော သူများကို ချိန်ပြီး ဒီတရားကို လှလှပပ ဟောသွားခဲ့ပုံရပါတယ်။
“ဆရာတော်ဘုရားကြီး”ရဲ့ စေတနာက ဗုဒ္ဓဘာသာရဲ့ အခြေခံကောင်းဖြစ်တဲ့“ ကိုယ်ချင်းစာ တရား”ကို ပိုင်ပိုင်နိုင်နိုင်ကြီး ရစေချင်တာပါ။“ကိုယ်ကြိုက်တာ ကိုယ်လုပ်”ဆိုတာ..။ ကိုယ်မကြိုက်တာ- သူ့အသက် သတ်ခြင်း၊ ညှဉ်းဆဲခြင်း၊ သူ့ဥစ္စာခိုးယူခြင်း၊ သူ့လင်၊ သူ့မယား ကျူးလွန်စော်ကားပြစ်မှားခြင်း၊ လိမ်ညာပြော ဆိုခြင်း၊ သေရည်အရက် မူးယစ်ပစ္စည်း သုံးစွဲခြင်း။
ကိုယ်ကြိုက်တာ-သူ့အသက်မသတ်ခြင်း၊ အသက်ကယ် ခြင်း၊သူ့ဥစ္စာ မခိုးဝှက်ခြင်း၊ပေးကမ်း ကူညီခြင်း၊မလိမ် မညာ အမှန်ကိုသာပြောဆိုခြင်း၊သေရည်အရက်မူးယစ် ဆေးဝါး ရှောင်ကြဉ်ခြင်း။
ဒါကြောင့် “ကိုယ်ကြိုက်တာ ကိုယ်လုပ်”ဆိုတာ “ငါးပါး သီလစောင့်ထိန်းပါ”လို့ ဟောလိုရင်း ဖြစ်ပါတယ်။
ငါးပါးသီလဆိုတာ ကမ္ဘာလောက သာယာငြိမ်းချမ်းဖို့ အခြေခံစည်းမျဉ်း ဥပဒေလည်း ဖြစ်ပါတယ်။ “မဟာဗောဓိမြိုင်ဆရာတော်ဘုရားကြီး”ရဲ့ ဒီတရားနာ ခဲ့ကြတဲ့ ထောင်သောင်းချီတဲ့ သူများဟာ ငါးပါးသီလ ဆောက်တည်ပြီးသားလည်းဖြစ်သွားတော့တယ်။
ကြမ်းပေ့၊ရမ်းပေ့ ဆိုတဲ့ "မုဆိုးကြီး" ကို အပါယ်ဆင်းရဲ က လွတ်မြောက်အောင် ကယ်တင်ပြီး “သောတာပန်” တည်စေခဲ့တဲ့ “မယားသောတာပန်”ရဲ့ ပြုပြင်နိုင်စွမ်းဟာ လည်း ပြောစမတ် တွင်ကျန်ခဲ့ပါတယ်။
("မဟာဗောဓိမြိုင်ဆရာတော်ဘုရားကြီး၏
ကိုယ်ကြိုက်တာ ကိုယ်လုပ် " တရားတော် မှ)
Credit:Original uploader.
No comments:
Post a Comment