၂၁ရာစု၏ အကြီးကျယ်ဆုံးသော တရားပြဆရာတော်
(သို့မဟုတ်)
အကျွန်ုပ်၏ အကြီးမားဆုံး ကျေးဇူးတော်ရှင်
******************************************
ဆရာတော်သာ မထွန်းပေါ်လာဘူးဆိုရင်
အကျွန်ုပ်သည်လည်း သာသနာတော်သို့
ရောက်ရှိလာမည် မဟုတ်ပါ။
ဆရာတော်၏ကြီးကျယ်မြင့်မားသော
သီလဂုဏ်၊သမာဓိဂုဏ်၊ပညာဂုဏ်တို့ဖြင့်
မေတ္တာကရုဏာရှေးထားပြီး
ဟောကြား ရေးသားထားသော
*စိတ်ဓာတ်ပြုပြင် ပြောင်းလဲရေး.တရားဒေသနာတော်*
၏ အစွမ်းသတ္တိကြောင့် သံဝေဂကြီးမားစွာ ဖြစ်ပေါ်လာပြီး
သံသရာကြီးကို စက်ဆုပ်ရွံရှာမိကာ
ထိုသံသရာကြီးမှ အမြန်ဆုံး.လွတ်မြောက်နိုင်ရန်
သာသနာတော်၌ အသက်ထက်ဆုံးနေထိုင်ဖို့
ရဲရဲဝံ့ဝံ့ ဆုံးဖြတ်ချက် ချနိုင်ခဲ့ပါသည်။
ထိုမှတဆင့် ဆရာတော်ကြီး၏ ခြေတော်ရင်းရှိရာ
ဖားအောက်တောရသို့ အဖော်မပါ ခြေဗလာနှင့်
အသပြာငွေကြေးကင်းရှင်းစွာဖြင့်
အပြေး ခိုလှုံ နေမိပါတော့သည်။
ထိုသို့နေစဉ် ဆရာတော်ကြီး၏
*သာပတ္တိကဿ ဘိက္ခဝေ နိရယံဝါ
ဝဒါမိ တိရစ္ဆာနယောနိံ ဝါ*
အာပတ်တန်းလန်းနှင့် သေသောသူအား
ငရဲ သို့မဟုတ် တိရစ္ဆာန်ဘဝတခုခုသို့ ရောက်ရမည်
အစရှိသောဒေသနာ၊
မိမိကိုယ်ကို တကယ်ချစ်တယ်ဆိုရင်
ဒီသီလလေးကို ဖြူဖြူစင်စင် မစောင့်ထိန်းသင့်ဘူလား
အစရှိသော သီလနှင့် ပတ်သက်၍
ဆိုဆုံးမ စကားများကို မကြာခဏ ကြားနာခဲ့ရ၍
သီလနှင့်ပတ်သက်၍ ဖြူစင်ခွင့် ရရှိခဲ့ပါသည်။
နောက်တစ်ခုက
မဂ္ဂင်ရှစ်ပါးထဲ၌ သမ္မာသမာဓိမဂ္ဂင် မပါဘူးလား။
ပါပါတယ်။
ဒီလိုဆို သမထသမာဓိတွေဟာ
သာသနာပတရားတွေလို့
ပြောလို့ရပါမလား။
သမ္မာသမာဓိဆိုတာ ဥပစာရသမာဓိနှင့် တကွ
ရူပဈာန်၊အရူပဈာန်ဟုဆိုအပ်သော
သမာပါတ်ရှစ်ပါးကို ခေါ်ပါတယ်
ဘုရားရှင်က
*သမာဓိံ ဘိက္ခဝေ ဘာဝေထ၊ သမာဟိတော ဘိက္ခဝေ
ဘိက္ခု ယထာဘူတံ ပဇာနာတိ၊
ချစ်သားတို့ သမာဓိကို ပွားများကြပါကုန်လော့၊
သမာဓိရှိသူသာလျှင်
သစ္စာလေးပါးကို ဟုတ်တိုင်းမှန်စွာသိမြင်နိုင်မည်*
အစရှိသော သမာဓိအရေးကြီးပုံနှင့် စပ်သော
အဆုံးအမများကို နားကြားရပြန်၏။
ထိုသို့ နာကြားရပြန်သောကြောင့်လည်း
ယနေ့ခေတ်၌ သမထသာသနာပတရားများကို
မရှု့နဲ့၊ ရူးတတ်တယ်၊
ဘုရားသာသနာနှင့်ကြုံတုန်း ဝိပဿနာကိုသာရှု့လို့
သမာဓိတရားကို ကဲ့ရဲ့ပြီး ပြောဆိုတတ်သော
စိတ်ကူးယဉ်ဝိပဿနာသမားများ၏ စကားများကို
ကျော်လွှားနိုင်ခဲ့ပြီး ဗုဒ္ဓအလိုကျ သမာဓိကျင့်စဉ်ကို
ကျင့်ကြံခွင့် ရရှိခဲ့ပါသည်။
ဆက်လက်၍
တစ်စက္ကန့်မှာ ကုဋေတသိန်းကျော်ဖြစ်ပျက်နေသည့်
နာမ်ဝီထိများကို ဘယ်လိုလုပ် ရှု့လို့ရနိုင်မလဲ၊
အဝိနိဗ္ဘောဂရုပ်အစရှိသော
ရုပ်ကလာပ်များကို ဘယ်လိုရှု့လို့ရမှာလဲ၊
အတိတ်၊အနာဂတ် ဘယ်လိုရှု့လို့ရမှာလဲ၊
ပဋိစ္စသမုပ္ပါဒ် ဘယ်လို့ရှု့လို့ရမှာလဲ အစရှိသည်ဖြင့်
ပြောဆို ကဲ့ရဲ့နေကြသည့် ကြားထဲက
ပြည်တွင်းပြည်ပမှ ရဟန်းရှင်လူပရိသတ်များကို
စာပေကျမ်းဂန်နှင့်အညီ လက်တွေ့ အောင်မြင်အောင်
တရားဟော တရားပြနိုင်သော စွမ်းအင်သတ္တိများကို
ကိုယ်တိုင် ကြုံတွေ့ ခဲ့ရပါသည်။
ထိုကြောင့်
၂၁ရာစု၌ ဗုဒ္ဓ၏ စာပေပိဋကတ်ကျမ်းဂန်နှင့်အညီ
သီလ၊သမာဓိ၊ပညာကျင့်စဉ်တို့ကို
အပြည့်စုံဆုံး ပြသနိုင်သော
အကြီးကျယ်ဆုံးသော တရားပြဆရာတော်ကို
ဓမ္မမိတ်ဆွေများ ပြသပါလို့ ပြောဆိုမေးမြန်လာခဲ့ရင်
ထိုဆရာတော်သည်ကား
အကျွန်ုပ်ဘဝ၏ အကြီးမားဆုံးသော ကျေးဇူးတော်ရှင်
ဖားအောက်တောရဆရာတော်ကြီးပင် ဖြစ်ပါတယ်လို့
ရဲရဲဝံ့ဝံ့ ပြောဆိုလိုက်ရပါတော့သည်။
ရွှင်လန်းချမ်းမြေ့ကြပါစေ
ဆရာတော်ကြီး၏ အညတရ တပည့်တစ်ဦး
No comments:
Post a Comment