ဥမ္မာဒန္တီရဲ့ဘဝဇာတ်ကြောင်း
================
အဝတ်သင်္ကန်းတွေကို ပေးလှူနေခြင်းသည် ရုပ်အဆင်းကို လှပတင့်တယ်အောင် ပေးလှူနေသည်မည်တယ်ဆိုပြီးတော့ မြတ်စွာဘုရားက ဟောတော်မူပါတယ်။
ဒီနေရာမှာ ထင်ရှားတဲ့သာဓကတစ်ခုကတော့ ဥပ္ပလဝဏ်ထေရီမရဲ့ အလောင်းအလျာဖြစ်တဲ့ ဥမ္မာဒန္တီအမျိုးကောင်းသမီးတစ်ဦးရဲ့
အကြောင်း အရာပဲ ဖြစ်ပါတယ်။
သူမဟာ တစ်ခုသော အတိတ်ဘဝမှာ
အလွန် ဆင်းရဲသူတစ်ဦး ဖြစ်ခဲ့ဖူး ပါတယ်။ ဝတ်ပန်းပုဆိုးတစ်ထည် ရရှိဖို့ရန်အတွက် (၃)နှစ်ကျွန်ခံဖို့ရန် ခံဝန် ချက်ဖြင့် သူဌေးတစ်ဦးထံမှာ သွားရောက်ကာ ကျွန်ခံရပါတယ်။
သို့သော် ဒီအမျိုးကောင်းသမီးရဲ့ ဝတ္တရားကျေပြွန်မှုကြောင့် (၃)နှစ် မပြည့်မီမှာပဲ သူဌေးက ကျေနပ်သဖြင့် တစ်ခဲနက် ထူထပ်တဲ့ ဝတ်ပန်းပုဆိုးနှင့် အတူတကွ အဝတ်ပိုကိုပါ ဆောင်းပြီး ပေးလိုက်ပါတယ်။ မိတ်ဆွေအပေါင်းအဖော်တွေနှင့် အတူ မြစ်ဆိပ်တစ်နေရာမှာ ရေသွားချိုးကြတယ်။ ရေချိုးပြီးပါက အလွန် ဝတ်ချင်နေသည့် ဝတ်ပန်းပုဆိုးကို ဝတ်ရန်ဆိုတဲ့ ဦးတည်ချက်နှင့် ရေသွားချိုးခြင်း ဖြစ်ပါတယ်။
ထိုအချိန်အခါမှာ အဝတ်သင်္ကန်းပြတ်တောက်နေတဲ့ သစ်ခက်သစ်ရွက် တို့ကို ဝတ်ဆင်လာတဲ့ ကဿပဘုရားရှင်ရဲ့ တပည့်သာဝက ရဟန်းတော် တစ်ပါးကို တွေ့မြင်လိုက်ရတဲ့အခါ မိမိရရှိထားတဲ့ ဝတ်ပန်းပုဆိုးကို ထက်ဝက် ပိုင်းကာ လှူဒါန်းမယ်ဆိုတဲ့ ဦးတည်ချက်ဖြင့် ရေထဲမှ တက်ကာ အဝတ်အစား လဲပြီး ဝတ်ပန်းပုဆိုးကို ထက်ဝက်ပိုင်းကာ လှူဒါန်းလိုက်ပါတယ်။ ရဟန်းတော်က သူလှူဒါန်းလိုက်တဲ့ အဝတ်ပုဆိုးကို သင့်တင့်တဲ့ တစ်နေရာ သို့ သွားရောက်ကာ ဝတ်ဆင်ပြီး ကြွလာတော်မူပါတယ်။
ထိုရဟန်းတော်ကို ကြည့်ပြီး အလွန် ပီတိတွေ ဖြစ်သွားတယ်။ ရှေးယခင် အဝတ်မရှိစဉ်က ထိုရဟန်းတော်မှာ ကြည့်ရှုလို့ မတင့်တယ်သော်လည်း အဝတ်သင်္ကန်းကို ဆင်မြန်းပြီးတဲ့အခါ အလွန်တင့်တယ်သွားတာကို ကြည့်ပြီး အလွန်နှစ်သက် ဝမ်းမြောက်သွားတဲ့အတွက် ကျန်နေတဲ့ အဝတ်ပိုင်းကိုပါ ထပ်ဆင့်ပြီး
လှူဒါန်း ပူဇော်လိုက်ပါတယ်။
ထိုရဟန်းတော်ကလည်း သင့်တင့်လျောက်ပတ်တဲ့ တစ်နေရာကို သွားပြီးတော့ သစ်ခက်သစ်ရွက်အားလုံးကို စွန့်ပယ်ကာ အဝတ်ပိုင်း တစ်ခုကို သင်းပိုင်အဖြစ် ဝတ်ဆင်ကာ အဝတ်ပိုင်းတစ်ခုကို ကိုယ်ဝတ်သင်္ကန်း အဖြစ် ဝတ်ဆင်ကာ ထွက်ခွာလာခဲ့ပါတယ်။
ထိုအချိန်အခါမှာ ထိုရဟန်းတော်ရဲ့ သန္တာန်မှာ ဝတ်ပန်းပုဆိုးအဝတ်ရဲ့ အရောင်အဆင်းကြောင့် တက်သစ်စ နေလုလင်ကဲ့သို့ တစ်ကိုယ်လုံးမှာ အသားရောင်နှင့် သင်္ကန်းရောင်ဟာ တစ်ရောင်တည်း ဖြစ်သွားတယ်။ ထို အမျိုးသမီးက ထိုရဟန်းတော်ကို ယခုလို ဖူးတွေ့လိုက်ရတဲ့အခါမှာ
ဝမ်းအသာကြီးသာကာ အကြည်နူးကြီး ကြည်နူးနေပါတယ်။
အဲဒီမှာ ဆုတောင်းတယ်
'ဘဝကြီးငယ်အသွယ်သွယ်မှာ ကျင်လည်ခဲ့ရ မယ်ဆိုလျှင် အသာဆုံး အမြတ်ဆုံးဖြစ်တဲ့ ရုပ်အဆင်းကို ဆောင်ထား နိုင်တဲ့ အမျိုးကောင်းသမီး ဖြစ်ပါရစေ'
'သူ့ကို မြင်ရတဲ့အခါ ဘယ် ယောက်ျားမဆို မိမိရဲ့ ပင်ကိုသဘောထားအတိုင်း ရပ်တည်နေဖို့ရန် မစွမ်းနိုင် ပါစေသား'
'သူ့ထက် သာလွန်တဲ့ ရုပ်အဆင်း လှပတင့်တယ်တဲ့ အခြားအမျိုးသမီးဆိုတာ မရှိပါစေသား'လို့ ဆုတောင်း တယ်။
ခန့်မှန်းကြည့်ရတာကတော့ ဒီအမျိုးကောင်းသမီးကလေးဟာ
အဲဒီ ဘဝမှာ -- အလွန်လည်း ဆင်းရဲနွမ်းပါးပြီး ရုပ်အဆင်းကလည်း သိပ်လှပဟန် မတူဘူး။ ဆင်းရဲနွမ်းပါးမှု ရုပ်အဆင်းရဲ့ မလှပမှုတို့ကြောင့် အခြားအခြားသော အမျိုးသမီး အမျိုးသားတွေနှင့် ဆက်ဆံရတဲ့အပိုင်းမှာ ဘဝကို နာကြည်းချက် ကလေးတွေက ရှိနေပုံရပါတယ်။
အမျိုးသမီးအချင်းချင်း အဖက်မလုပ်ချင်တဲ့ သဘော, ပစ္စည်းဂုဏ် အလှဂုဏ်တွေ မောက်နေသူတို့က မောက်မောက်မာမာ အပေါ်စီးက ဆက်ဆံမှုကို အကြိမ်များစွာ ခံနေရတဲ့ သဘောကလေးတွေလည်း
ရှိကောင်း ရှိပါလိမ့်မယ်။
အလှူရှင်ဖြစ်တဲ့ အမျိုးကောင်းသမီးကလေးရဲ့ သန္တာန်မှာ --
၁။ ကိုယ်ကျင့်သီလဖြူစင်ခြင်း,
၂။ သုံးနှစ်နီးပါး ကျွန်ခံကာ တရားသောနည်းလမ်းဖြင့် ရှာဖွေ
စုဆောင်း ထားတဲ့ ဝတ်ပန်းပုဆိုးဆိုတဲ့
လှူဖွယ်ဝတ္ထုပစ္စည်း ဖြစ်ခြင်း,
၃။ ပေးလှူနေတဲ့ အချိန်အခါမှာ ရာဂ, ဒေါသ, မောဟ, မာန်မာနစတဲ့ ကိလေသာတရားဆိုးတို့ ဝင်ရောက် နှောင့်ယှက်မှု မရှိသဖြင့် ကြည်ရွှင် ဝမ်းမြောက်နေတဲ့ ပီတိသောမနဿ ပြဓာန်းနေတဲ့ ကုသိုလ်စိတ်အစဉ် တွေသာ ဖြစ်နေတဲ့ ကြည်လင်သော စိတ်ထား ရှိခြင်း,
၎။ ကံ-ကံ၏အကျိုးတရားကို သက်ဝင်ယုံကြည်နေတဲ့ သဒ္ဓါတရား ရှိခြင်း ဆိုတဲ့ ---
ဒီအင်္ဂါ (၄)ချက်နှင့် ပြည့်စုံနေပါတယ်။
တစ်ဖန် အလှူခံပုဂ္ဂိုလ်ကို ကြည့်လိုက်တော့ ကဿပဘုရားရှင်၏ တပည့်သာဝကတစ်ဦးဖြစ်တဲ့ သီလ ရှိတဲ့ အရှင်ကောင်း အရှင်မြတ် ဖြစ်နေခြင်းဆိုတဲ့ ဒီအင်္ဂါရပ်နှင့်လည်း ပြည့်စုံ နေပြန်တယ်။
အလှူပေးတဲ့ပုဂ္ဂိုလ်ဘက်က အင်္ဂါလေးချက်, အလှူခံပုဂ္ဂိုလ်ဘက်က အင်္ဂါတစ်ချက်၊ ပေါင်းလိုက်တော့ အင်္ဂါငါးချက် စုံညီနေတဲ့ အလှူဒါနတစ်ခု ဖြစ်နေတယ်။
ထိုအမျိုးကောင်းသမီး ကလေးဟာ တစ်ချိန်မှာ သိဝိတိုင်း အရိဋ္ဌပုရမြို့မှာ ကုဋေရှစ်ဆယ် ကြွယ်ဝ ချမ်းသာတဲ့ တိရိဋိဝစ္ဆအမည်ရှိတဲ့ သူဌေးကြီးရဲ့ သမီးရတနာတစ်ဦး ဖြစ်လာခဲ့ ပါတယ။် သူ့ကို ဥမ္မာဒန္တီ ဆိုတဲ့ နာမည်ကို ပေးထားပါတယ။်
သြူပုစုပျိုးထောင် ခဲ့တဲ့ ဆည်းပူးခဲ့တဲ့ ကံတွေက အကျိုးပေးလာပြီ ဖြစ်တယ်။ (၁၆)နှစ်အရွယ်လောက် ရောက်လာတဲ့အခါ ရုပ်အဆင်းတွေက သိပ်ပြီးတော့ လှပတင့်တယ်နေပြီ၊
လူတို့၏ ရုပ်အဆင်းကို လွန်သွားပြီ၊
နတ်သမီး ကဲ့သို့ ရုပ်အဆင်းက အလွန် လှပတင့်တယ်နေပြီ၊
ဘယ်လိုပဲ ကြည့်ကြည့်၊ ကြည့်ရှုရသူတို့ မျက်စိမှာ အလွန်ကြည့်လို့ကောင်းနေပြီ၊ မြင်ရသူတို့ရဲ့ စိတ်ကို ကြည်လင်စေတတ်တဲ့ ကြည်ညိုဖွယ်ဂုဏ်ကို ဆောင်ထားနိုင်တဲ့ ရုပ်အဆင်း- မျိုးကလည်း ဖြစ်နေပြန်ပြီ၊ ခန္ဓာကိုယ်အနေအထားကလည်း
အလွန်အချိုး- ကျပြီး လွန်မြတ်သော
ရုပ်အဆင်း လုံးရပ်သဏ္ဌာန်နှင့်လည်း ပြည့်စုံနေပြီ ဖြစ်တယ်။
ဒါကြောင့် ဘုရားရှင်က --
'ဝတ္ထဒေါ ဝဏ္ဏဒေါ ဟောတိ =
အဝတ် သင်္ကန်းကို လှူဒါန်းခြင်းသည် ရုပ်အဆင်းကို လှူဒါန်းသည်မည်တယ်'လို့ ဟောကြားတော်မူခြင်း ဖြစ်တယ်။
ဒါကတော့ သူ့ရဲ့ ဆုတောင်းနှင့် လျော်ညီစွာ ကံဆိုတဲ့ တရားမင်းကြီးက စီရင်ချက်ချပေးလိုက်ခြင်းပဲ ဖြစ်ပါတယ်။
ဖားအောက်တောရ ဆရာတော်ဘုရားကြီး ၏ အဘယ်အလှူကိုပေးလှူရမလဲ? စာအုပ်မှ………။
No comments:
Post a Comment