"မေးခွန်း"
သမထဘာဝနာ ပွားပြီးမှ ဝိပဿနာဘာဝနာ ကူးသော အားထုတ်နည်းနှင့် ဝိပဿနာ ဘာဝနာ သက်သက်သာ အားထုတ်နည်းတို့၏ အားနည်းချက်၊ အားသာချက်များကို သိလိုပါသည် ဘုရား။
"ဖြေဆိုခြင်း"
သမထ ကျင့်စဉ်တစ်ခုကိုကျင့်ပြီး ဝိပဿနာ ကူးလျှင် ပိုပြီးတော့ လျင်မြန်သက်သာ လွယ်ကူနိုင်တယ်လို့ ပြောလို့ရတယ်။ ဘာဖြစ်လို့လဲဆိုတော့ သမထကျင့်စဉ် တစ်ခုအရ သမာဓိ စွမ်းအားတွေ တက်လာလို့ရှိရင်
"သမာဟိတော ယထာဘူတံ ဇာနာတိ"၊
သမာဓိက ယထာဘူတဉာဏ်ကို ဖြစ်စေတာပေါ့။
မြတ်စွာဘုရားလက်ထက် သာသနာရှေ့ပိုင်း ရဟန်းတော်တွေ တော်တော်များများက သမထကျင့်စဉ် ပေါက်ရောက်ပြီးမှ ဝိပဿနာကူးကြတာ ဖြစ်ပါတယ်။
သမထ ကျင့်ပြီးတဲ့အခါကျတော့မှ ဝိပဿနာ ဘက်ကူးတာ ပိုပြီးတော့ လွယ်ကူတယ်လို့ ဆိုပါတယ်။
ဝိပဿနာ သက်သက် သွားလို့ရှိရင် သမာဓိထူထောင်ရတာ ခက်တယ်။ ဝိပဿနာ ဆိုတာက သွေ့ခြောက်တယ်။
သမထလို မဟုတ်ဘူး။
သမထဆိုတာ စိတ်ကို အာရုံတစ်ခုထဲမှာ ငြိမ်နေအောင် ထားတာ။ စိတ်ငြိမ်လို့ရှိရင် အသိဉာဏ်ကလည်း ပိုပြီးတော့ စွမ်းဆောင်နိုင်လာတယ်။
ဝိပဿနာကျတော့ အဲဒီလို မဟုတ်ဘူး။ သဘာဝတရားတွေကို ဆင်ခြင်စဉ်းစားပြီး နေရသည့်အတွက်ကြောင့် သဘာဝတရားတွေထဲမှာ စိတ်ပျက်စရာတွေ မြင်မယ်၊ အနိစ္စ မြင်မယ်၊ ဒုက္ခ မြင်မယ်၊ ကိုယ် မပိုင်တာတွေ၊ မစိုးပိုင်တာတွေ မြင်မယ်။ မြင်လာတဲ့အခါ စိတ်ဓာတ်တွေ ခြောက်ခြားတယ်။ နောက် သင်္ခါရတရားကို ကြောက်စရာကြီးလို့ မြင်လာတယ်၊ ငြီးငွေ့စရာကြီးလို့ မြင်လာတယ်။ ဝိပဿနာ ကတော့ အဲဒီလို ခြောက်ခြားစရာတွေနဲ့ သွားတာပေါ့။ စိတ်ပျက်စရာတွေ၊ ငြီးငွေ့စရာတွေနဲ့ ဝိပဿနာက သွားတယ်။
သမထက သွားလို့ရှိရင်တော့ အဲဒီအဆင့်တွေကို လွယ်လွယ်ကူကူနဲ့ ကျော်လွှားပြီး သဘာဝတရားတွေကို ရှင်းခနဲ ရှင်းခနဲ သိသွားနိုင်တာပေါ့။
နောက်ဆုံးကျလျှင်တော့ ဝိပဿနာ သမာဓိကလည်းပဲ အဆင့်မြင့်သွားလို့ရှိရင် သမထသမာဓိလို စွမ်းဆောင်သွားပါတယ်။ အဆက်မပြတ် မှတ်နိုင်သွားပြီဆိုလျှင် ဝိပဿ နာ သမာဓိကလည်း သမထသမာဓိလို အားကောင်းတာပဲ။
သို့သော် သမထ အားထုတ်တဲ့အခါ ချမ်းသာသုခကို အခြေခံပြီးတော့ အားထုတ်တာဖြစ်တယ်။
ဝိပဿနာ သက်သက် အားထုတ်တာကျတော့ ဒုက္ခသက်ကက်၊ ခြောက်ခြောက်သွေ့သွေ့ဘက်က သွားတာဖြစ်တယ်ပေါ့။
အဲဒါကတော့ ပုဂ္ဂိုလ်ရဲ့ဆန္ဒအရပေါ့။ ကိုယ်ကြိုက်တဲ့လမ်းကနေ ရွေးပြီးတော့ လျှောက်ရမှာပေါ့။ ကုန်းကြောင်း လျှောက်ချင်တာလား၊ ကားစီးချင်တာလား၊ တစ်ခုခုပေါ့နော်။
အဲဒီတော့ ဘယ်လမ်းကသွားသွား သင်္ခါရတရားတွေရဲ့ မမြဲတဲ့သဘောတွေကို ဆင်ခြင်ပြီး လောဘ၊ ဒေါသ၊ မောဟ ဆိုတဲ့ ကိလေသာတရားတွေ ကုန်ဖို့ကသာ အဓိကကျတယ်ပေါ့။
နောက် သတိထားစရာ အချက်လေးတစ်ခုက သမထသမာဓိနဲ့ ဝိပဿနာ သမာဓိ အာရုံချင်း မတူဘူး ဆိုတာပဲဖြစ်တယ်။
ဘုန်းကြီးတို့ သီရိလင်္ကာနေတုန်းက ကိုးရီးယား ဘုန်းကြီးတစ်ပါးက မေးဖူးတယ်။ သူမေးတဲ့ မေးခွန်းကတော့ "သမာဟိတော ယထာဘူတံ ဇာနာတိ"၊
လို့ မြတ်စွာဘုရားက ဟောတယ်တဲ့။ သမာဓိရှိမှ ယထာဘူတဉာဏ်ရနိုင်တယ်၊ တချို့က သမာဓိ မထူထောင်ဘဲ ဝိပဿနာ သက်သက် လုပ်လို့ရှိရင် အောင်မြင်တယ်လို့လည်း ပြောကြတယ်ပေါ့။ သမာဓိမပါဘဲနဲ့ ဝိပဿနာ ဖြစ်တယ်ဆိုတာကို သူမယုံကြည်ဘူးလို့ ပြောတယ်။
အဲဒီမှာ သမာဓိဆိုတဲ့အဆင့်က ဘယ်အထိတောင် ပြောရမှာတုံးဆိုရင် သမာဓိဆိုတဲ့ အဆင့်သည် အပ္ပနာဈာန်ထိအောင် သွားတာလား (သို့မဟုတ်) ဥပစာရထိအောင် သွားတာလား။
သမာဓိက နှစ်မျိုး ရှိတယ်။
သမထကျင့်စဉ်ကိုကျင့်ပြီး ဥပစာရသမာဓိအဆင့်ကနေ ဝိပဿနာ ကူးတာရှိတယ်။ သို့မဟုတ် အပ္ပနာ ဆိုတဲ့ ဈာန်ရပြီးတဲ့နောက်မှ ဝိပဿ နာ ကူးတာရှိတယ်။ အဲဒီနှစ်ခုစလုံးဟာ သမာဓိ ထူထောင်ပြီးတော့မှ ဝိပဿနာ ကူးတာ။
အဲဒီလို မဟုတ်ဘဲနဲ့ ဝိပဿနာ အာရုံ တစ်ခုကို တိုက်ရိုက်ရှုမှတ်တာ။ သင်္ခါရ အာရုံတွေကစပြီး ရှုမှတ်တာ။ သမထကျင့်စဉ်တွေကိုမကျင့်ဘဲ ကျင့်တာမျိုးလည်း ရှိတယ်။
အဲဒီမှာ သမထသမာဓိရဲ့ အာရုံက ပညတ်၊
ဝိပဿနာ သမာဓိရဲ့ အာရုံက ပရမတ်။
အဲဒီလို မတူတာကို သတိထားဖို့လိုတယ်။
ဆိုပါစို့။
သမထမှာရှိတဲ့ သမာဓိတရားက ပညတ်ကို အာရုံပြုတာ။ ပညတ်ပေါ်မှာ စိတ်ကိုငြိမ်အောင်လုပ်တာ။
ဝိပဿနာ သမာဓိဆိုတာကျတော့ ပညတ်ပေါ်မှာ မဟုတ်ဘူး။ ပရမတ္ထတရားပေါ်မှာ - ပရမတ္ထတရားဆိုတာ အစဉ်ရွေ့လျားနေတဲ့၊ ဖြစ်ပြီးပျက်နေတဲ့ သဘောတရားတွေ၊ အဲဒီဖြစ်ပျက်နေတဲ့ သဘောတရားတွေပေါ်မှာ စိတ်ကိုထားတယ်ဆိုတာ အာရုံကသာ ဖြစ်ပျက်နေမှာ မဟုတ်ဘူး၊ စိတ်ကလည်း ဖြစ်ပျက်နေတာ။
နှစ်ခုစလုံးဟာ ရွေ့လျားနေတယ်ဆိုတာကို သိရတယ်။
အဲဒါက ဝိပဿနာ သမာဓိ။
ဝိပဿနာ သမာဓိမှာ အသိဉာဏ်က ဦးဆောင်သွားတယ်။
သမထ သမာဓိကျတော့ ပညတ်ပေါ်မှာပဲ တည်ငြိမ်နေတယ်။
ဒါကြောင့် ဝိပဿနာ သမာဓိက momentry ပဲ။ တစ်ခဏလေး တစ်ခဏလေး တန့်ပြီး ရွေ့နေတာ။
သမထ သမာဓိကျတော့ ငြိမ်နေအောင် လုပ်ထားတာ။ အာရုံပေါ်မှာ remain လုပ်ထားတယ်။
ဥပမာဆိုပါတော့- အဖြူရောင် ကသိုဏ်းကို ရှုတယ်ဆိုလျှင် အဖြူရောင်ပေါ်မှာ စိတ်က ငြိမ်နေတယ်။ ဒီပြင် ဘာမျှ မစဉ်းစားဘူး။
ဝိပဿနာ ကျတော့ အဲဒီလို မဟုတ်ဘူး။ ဖြစ်ပြီးပျက်သွားတဲ့ သဘာဝတရားတွေကို ရှုနေတာ။ အဲဒီပေါ်မှာရှိတဲ့ သမာဓိက ပညတ်အာရုံ မဟုတ်ဘဲ ပရမတ်အာရုံ ဖြစ်သွားပြီ။
အဲဒီတော့ သမာဓိချင်း မတူဘူးလို့ ရှင်းပြရတယ်။
"သမာဟိတော ယထာဘူတံ ဇာနာတိ" ဆိုတာ
ဝိပဿနာ သမာဓိကို ယူရတယ်။
ဝိပဿနာ သမာဓိသည် ယထာဘူတဉာဏ်ကို ဖြစ်စေနိုင်တယ်။
တစ်ခုနဲ့တစ်ခု မတူဘူး။
အဂ္ဂမဟာပဏ္ဍိတ အရှင်နန္ဒမာလာဘိဝံသ
